Article - THIL SIAM ZAWNG ZAWNG HNÊNA CHANCHIN ȚHA

THIL SIAM ZAWNG ZAWNG HNÊNA CHANCHIN ȚHA

"Khawvêl zawng zawngah kal ula, thil siam zawng zawng hnênah chuan, Chanchin Țha hi hril rawh u..." (Marka 16: 15)

   

He thu hi kan Lalpa Isua thupêk hnuhnung ber leh a ngaih pawimawh êm êm ani a. "Kal ula.." a ti; "An lo kal anga, lo hrilh rawh u," a ti rêng rêng lo!

   

    Khawiah nge kan kal ang a, tute hnênah nge Chanchin Țha chu kan hrilh ang?

    Khawvêl zawng zawngah, thil siam zawng zawng hnênah!

    Ka ngaihtuah fo țhîn a. Chanchin Țha hi mihringte hnênah mai ni lovin, thil siam zawng zawng hnêna hril tûr kan lo ni, lo kal theilo leh lo kal hauh lo tûrte hnên thlengin, tih hi.

   

Thing leh mau, rannung leh ransa te pawh a target vek mai zu nia! Thingkung hian duh thlang thei ni sela, Mizopa kawtkâi a awm chu a thlang hauh lovang le! Țul miah lova kal paha kan sah hliam nasat țhin zia te hi! An ser thliah thluah a. Sir J.C. Bose an THE NERVOUS MECHANISM OF PLANTS (Plant response to stimuli) tih kum 1926 a a tlangzarh hma daih tawh khan, thlaite pawhin na (pain) an hre thei tih Bible ah Lal Isua chuan min hrilh tawh a, chuvangin Chanchin Țha pawh hi an hnêna hril  tel ve tûrin min duh alo ni!

  

Ran chungah lah kan ngilnei lo ber âwm e. Kan ei duh hauh loh tûr kan tih hlum fo țhinte, chêpa kawng kân hlê hlê lai kan vawm tak khut khut a! Vairam inte khu parva leh nungcha chi hrang hrangin an bâwm bîk a; keini erawh chu sairawkherh neilo pawhin kut zaizir talin kan han perh lem hrâm a!

  

Min rawn pan tûr pawha lo kal theilo, thing leh thlâite; lo kal duhlo tûr tih hriat reng reng nungchate hnênah pawh Chanchin Țha hril tûrin min ti ani!

   

Chuvangin, kan taksa mamawh, nunna chaw leh kan hman țangkai tûr atan Pathian siam an ni a, a bâk erawh chu suasam lova, duat tûrin i in zirtîr ang u. Chu chu an hriâtthiam ve zawng Chanchin Țha ani a,  Lal Isua thupêk pawh ani si a.