Article - MATEI

MATEI

    

La naupang angreng taka innei taná chu, kan fa tîr kan pai țantirh hian hmeichhiate an khua a sik thei tih hre lovin, ka nupui chu khawsik damdawi eng eng emaw ka pe nual a. Malaria damdawi an tih, khawchhak lam chhuak thlengin. Doctor kan pan chuan, "Damdawi in ei vak vak mai a, naute hi a tlâk loh pawhin a piangsual thei a. In la pai leh thei dawn thova, kan ziat mai dawn em ni?" alo ti a!

   

Fa hmasa ber tûr pai ta chêng a, tih hlum leh nghâl ngawt chu thil ni theiin kan hre si lova. Doctor dang, Dr. Zoremi (RIP) kha kan pan ta a. Ani chuan, "Damdawi ei pawhin pangngai takin an hring thei a, ei lo pawhin piangsual an hring thei thova; a petu Pathian thu thu ani," alo ti awlsam êt a. Chutichuan, pangngai takin 10th February 1994 khan kan nautê chu alo piang ta a.

   

Kum 3 anihin, ka inbualsan hlânin varandah ațangin inhnuai metalled road ah a tla a! Dawrpui West a Pu. Chhawla (RIP) inchung kan luahlai ani a. Towel chauh takmeuh veng chungin, Matei zawi ngiai mai chu ka pawm a, Bazar Bungkawn lam ațangin Civil Hospital panin ka tlânpui; engtik laiin nge ka towel ven pawh chu a tlâk ka hrelo. Casualty kawtah chuan Pu. Zadingluaia (RIP) K.T. Khuma Buildinga National Pharmacy nei țhîn khan, an dawr tukverh parda, ring awm fer fur min lo ven tîr nawk nawk a, min rawn ûmzui ni ngei tûr ani. Matei pawh chu a rawn țapchhuak ta bawk a, ka harhchhuak chauh! Eng chen nge saruâkin Hospital Road -ah khân ka tlân ang aw?!!

   

Doctor duty chuan a en uluk khawp mai a, "Hlauhthâwn tûr a awmlo. Nakinah luak emaw, pangngai lo deuha a awm chuan in lo kalpui leh vat dawn nia," tiin min hawtîr leh mai a.

   He ka fanu, Matei ngei hi ani, hemi ni ațanga kum 16 ral hnua a thin (liver) min phel tu kha!

  

ICU ațanga Cabin pangngai, a hran ve vea kan awm laiin Wheelchair nên min rawn tlawh a, chuta a thusawi chuan min vêl:

 

"Pa, a nat deuh chang pawhin tuar hrâm hrâm rawh aw.. ngaihtuah la, keini chu a na achhuah changin nurse kan kova, betadine tein min dressing sak a, nachhâwkna tein min chiu zêl a. Lal Isua erawh kha chu, kan tana Krawsa a awmlai khan, tumahin an dressing sak lova, nachhâwkna pawh an pêk loh kha.."

  

Mateii hian thihna vawi hnih meuh pumpelhin kei, a pa hi nunna thar min pe a; chu mai chu ala nilo, Lal Isua hriatnaah pawh kei ai chuan alo va puitling reuh êm!