Article - ABIDE WITH ME - H.F. LYTE

ABIDE WITH ME - H.F. LYTE

 

Vatâwk hi a thih dawnin mawi êm êmin a hrâm țhîn, an ti. Sâpho țawngkamah pawh 'Swan's song' an tih hi chu thuchah hnuhnung- ngaihnawm bawk si sawina ani. Henry Francis Lyte pawh kha natna khirh tak neiin, a taksa pawh a chau viau țhîn a. Ni khat chu kum 1847 khan a țhian țha tak (W.H.Monk?) nên tlai ni tla tûr sen no phût mai, zân lo thleng tûrin a thimhnan mêk lai chu thinlung taka lungleng êm êm chungin an thlir dûn a. Rei tak pawh dam a in beisei tawhlo ani thei a, chu bâkah a hrisêlna alo țhat zâwk beiseiin doctorin France rama han awm hrih tûra atih vanga a tûk maia kal alo tum bawk avang pawhin a lung pawh a chhe tel bawk a. Pencil leh lehkha a la a,

"Ka Lalpa duhtak, min awmpui ang che,

Khua a thim dawn, min kalsan suh ang che.."

a ziak zêl a, he hla mawi leh urhsûn tak; min ti lungchhe si, min thlamuan bawk si hi a rawn phuah chhuak ta ani. A țhian W.H.Monk hian a thlûk chu a siam ani, an ti. Lyte chu a tûkah chuan France rama va awm deuh tûr chuan a kal ta nge nge a. Nice a thlen ațanga rei vak lovah chuan a chau zual a, a thi zui ta ani.

 

He hla hi England Lal, King George V pawh khan a ngaina hlè a. A nupui neihna ah an sa a, a fanu pasal neihna ah pawh a sak tir leh a (a fanu tih hi tun hnua Queen Elizabeth- II hi). India ramah pawh Mahatma Gandhi-a hla ngainat berte zing ami ani a. Hmanah chuan Delhi kawtthlêrah Army Band in ni tlâk dawnin (retreat hunah) tlaitin an tum (play) țhîn a. Tunah pawh, inhmeh an ti ve ngei ani ang, Martarte hriatrengna hmunah te Regiment engemaw zat Band party te chuan an la hmang ani. An ngai khûnkhân hlê tih ka hriatna chu, "Chawhma lamah kan sa ngailo," an tih ka hre tawh!

"Hold thou thy Cross before my closing eyes,

Shine through the gloom and point me to the skies..."

        - Swan's song țha tak ani!