Article - A CHHUANG APIANGIN LALPA CHU CHHUANG RAWH SE

A CHHUANG APIANGIN LALPA CHU CHHUANG RAWH SE:

            Țumkhat chu, Rasdali khaw V.C Secretary leh a nupui that a, an pawisa zawng zawng laksak a, Tripura refugee camp-a tlânchhia Bidoram Reang, Baido leh Baireh rai te pathum chu ni 4 chhungin Tripura Police te țanpuinain KA zuk man fai vek a. Kolasib mipuiten khawih an châk dawn tih hrian, zan reh ah chauh ka luhpui a, Saidan Jailah KA dahlût nghâl a. KEIMA tâwkah ti țha KA inti hlê.

 

Mahse, a tûk lama kan Home Minister țawngkam ka hriat chu, Aizawl lama kan hotu lian, engkim KA tih fel vek hnua KA hrilh ve chauh te kha a fak nasa khawp a. KA hming rêng rêng a lang lo! KA vui mai ani lo, KA hnual mai ani lo, KA  hmuh apiang mai kha hnek hrep KA châk a !

  

Chutih lai tak chuan T.V. ah a hunlaia hla lâr tak Bethsy zai alo chhuak a :

"Nitinin ka nunna ah

 Duh thlan tûr a awm a:

 Tisa duhna leh Thlarau duhna ani....."

 

Ka ngaithla zêl a. " Lalpa, ka nunna hmangin, i nihna lantîr rawh, ENGKIM HI I ROPIUNAN hmang ang che."  Ka harh chhuak zawk mai! Chu hla chuan min vêl nasa kher mai! Sipai rualkhat zet ho țhîn tu kha nausên ang maiin ka țap bâng hleithei lo!

 

A rawng ka bâwl sak, Lal Isua aia lansarh ka lo tum a, ka chapona tlang chhîpah Bethsy zai chuan min rawn lâwn chilh a, ka nihna diktak, ka awmna tûr diktakah min hnûk thla ta!

 

T.V.ah chuan midang daih an lo zai tawh a,  kei erawh chu mittui luang țeuh chungin,

  "Lalpa, ka nunna hmangin,

   I nihna lantîr rawh,

   Engkim hi I ropuinan hmang ang che." tih lai kha ka sa nawn mawlh mawlh a.

"Isu, keimah kaltlangin ka mihring puite hnênah thil țha tih min phalsak țhin la, nangmah aia ka lansarh erawh phal ngai suh ang che," tiin ka țawngțai ta ani.