Article - KRAWS PU TUTE KAN NI

KRAWS PUTUTE KAN NI

            Kraws chu misual nung tlâklo te tih hlumna atana Rom sorkarin a hman țhin kha ani a. Tih duhdah, endawng, hmuhsit, thihnate a entîr a. Ka ngaihtuah a, kan Lal Isuan Kalvari tlang a put thlen ațang tawh khân, khawvêla amah zuitu Christiante hian englai pawhin, khawi ramah emaw tal tih duhdahna, hmuhsitna, tih hlum țeuh țeuh.... an tâwk reng mai chu anih hi! Rom Sorkar ațang tawh khân ințan in, Iron Curtain, ISIS....

 

Eng vangin nge he sakhaw betute chauh hian beih an tawh reng bîk mai le?

  A dang ho zawng zawng hi chu an beih tlâk loh vang pawh ani e. Tuar pawh ni se, hlâwkna a awm lova. A tak ni hlawm hek lo!

           

Christian ho erawh chu a nuaih têlin kum zabi tinah an martar ruih ruih bîk mai a. Kraws put chu khawvêl laka danglam ngamna anih vângin, khawvêl hian a 'ei' thei thlâwt lova. Chu chuan tih duhdahna tinrêng a hlawh chhuak a; thihna thlengin. Chu chu kan Kraws put ani.Vâna kan lawmman hmuh tûr chu hrehawm tinrêng tuar chhuak a kan hlawh tûr ani, tih Bible in min hrilh si a -

“Tin, upa zînga pakhat chuan ka hnênah, “Hêng puan vâr sinte hi tute nge ni a, khawi aṭanga lo kal nge an nih?” tiin mi bia a.Tin, kei chuan a hnênah, “Ka pu, nangman i hria alâwm,” ka ti a.Tin, anin ka hnênah, “Hêng hi hrehawm nasa tak ata chhuak hote kha an ni a, an puante Berâmno thisena suin an tivâr ta a.” (Thupuan 7:13-14)

Kan Kraws put hian hrehawm tinrêng keng tel mahse, min lo hmuaktu lawmman ropui tûr zia hre rengin, i thlah phal lul lovang u.