Article - TIRHKOH NUPUI - KA NU

TIRHKOH NUPUI - KA NU

  

Patling kum 40 râl kai tawh pawh, han damloh meuh chuan ka nu ka ngai țhîn. Nangni pawh in nih ve tho ka ring. Ka natna khum ațang hian, kan naupan lai - Tuikuk khua, Dangga a kan awmlai ka ngaihtuah chhuak a....

  

Zankhat chu kan in an rawk dân kha a dangdâi asin! Ka pa chu Tirhkoh tih takah rei deuh thanga zin a țûl fova. Kan unau chu hmun dangah lehkha zirin kan awm vek a; ka pa a zin chang chuan ka nu hian amah chauhin in a nghâk fo rêng a.

  

Nilai zân inkhawm hi ngaihtuah sawi nan hman ani țhîn a. Kan Kohhran mi, khuangpu Sasonpa chuan a țhian Christian lo ho a sâwm a, "Ka pu a zin a, zanin chu inkhawmna ah rei deuh thu ka sawi ang a. Chumi hlânin an in inlo rawk dawn nia. Ka pi a inkhawm loh pawhin ani chu a hlauhawm chuang loh, in rubo nghal mai dawn nia.." tiin a thurualpui a.

  

Ka nu kha a dam phawt chuan inkhawm țhulh ngai lo ani a. A ruahman ang ngei chuan, Sasonpa chuan rei tak mai chu thu a sawi ta a. Inkhawm bân chuan lalțîn nên ka nu chu a haw a, kawngkapui a han hawng chu, "Bang thlanglam chu kawngkapui aia zauvin alo êng duai mai a...!" atih ka la hre reng țhin!

  

Sasonpa inah ka nu ngotekherh, puanchei leh ka pa radio te an hmuchhuak vat a. Ani pawh chu a inpuang ta a.

  

Kharbari hmaah thiamloh a chan hnuin, Choudri Court ah thiamloh a chang leh a. Choudri thupêk in Sasonpa leilet neihchhun, zau vaklo chu ka pa an pe ta a. Mahse, ka nu chuan, "Hetiang huam hian alâwm ramthim, rûkru leh misual tinrêng tamna hmunah rawngbâwl tûra kan awm. A leilet hi neihsak ta ila, rûk rûk bâk eizawnna dang a neilo ang a, Christian ani thei tawh lovang. Ngaihdam tûr." ati bau mai a. A leilet pawh chu a nei lêt leh ta a.

  

Sasonpa rilru a kehsawm! Chumi ni ațang chuan Sasonpa, Christian satliah chu alo piangthar ta ani.

Note:

An Local Self-Government ah khuan, Kharbari hi Subordinate Court/Judge ani a. Choudri hi Superior Court/Judge ani.