Article- ENG ANG SIPAI NGE I NIH LE?

ENG ANG SIPAI NGE I NIH LE?

  "Lalber sipai kan ni,

  Thisena tlan kan ni;

  Lal Krista tan dopui turin

  Sipai ah kan insiam."

   

Sipai (Army) hi hlâwm lian deuh deuh chi hnih in a țhen theih a:

1. Ral hmatawng - Infantry

2. Puibâwm tu - Corps.

   

Infantry chu Regiment zawng zawngte hi an ni a. Hmêlma va luhchilh a, va pawmchilh tu, indona field a chêng te an ni.

  

Corps ho erawh chu Infantry ho mamawh zawng zawng lo pe (logistic support) tu te an ni. Ordinance Corps in silai, silai mu, bomb. Engineering Corps in a țûlna apiang ah leihlawn te dawhin, kawng te an sial a, Supply Corps in ration, thawmhnaw, mamawh tinrêng; Medical Corps in damdawi pêk leh hliam enkawl hna an thawk a. Chutiang zêlin Corps dang te pawh, Indona field a va luhchilh tuten hnehna an chan theih nan chanvo pawimawh êm êm an nei vek a.

   

Keini Kristiante pawh hi Lalpa Sipaite kan ni a, "Lal Krista tan dôpui tûrin Sipai ah kan insiam". Mahse, ramthim ah, mission field ah kan kal vek kher lo... a hmuna va luhchilh tu Infantry ang khian kal tâwk kan awm ang; Chutih rual chuan, an mamawh chi hrang hrangte  țha tak leh hneh taka lo "Supply" tu kan awm a ngai a, an hnathawh ti awlsam tûra lo puibâwm tu kan awm a ngai a, an hliamte lo enkawlsak tu kan awm a ngai a; A tu mah inthlahdah thei kan awm lova, kan chanvo in ang lo mahse, kan pawimawhna a in tluk tlang vek ani. Kan zavai a țanrualna chauhin hnehna min pe dawn ani.

   

Field ah i luhchilh dawn nge, thîlpêk leh țawngțaiin thachhang i dâwl dawn;

    Eng ang Sipai nge i nih le?