Article - LALPA LAMȚANG KAN LO NITA

LALPA LAMȚANG KAN LO NITA

            "A lama in țan chhung zawng Lalpa chu in lamah a țang anga, Amah in zawn chuan in hmu anga, Amah in hawisan chuan ani pawhin a hawisan ang che u" (2 Chronicles 15:2)

  

Mahni bawk hi entîrnan inhmang leh țhîn ila. Zuhmun bawih, leplêrh leh sual tinrêng lo ti ve tawh țhîn ka ni a. Khatih hunlai kha ka ngaihtuah lêt fo țhîn. Lalpa hrelo nunah chuan sum indaih ni a awmthei lova, leiba ngah vangin dawheh nih a țûl fova; kut tlinglova sum la lo theilo dingmunah min hruailût fova; 'mi pa' nichung renga kawp ka neih te khan, mak deuh maiin in lamah ka fate an dam țha hleithei lo, an zirlai pawh an ti țha hleithei dêr lo mai kha thil mak tak chu ani ve rêng rêng! Intihhlimna hmun awm ve ang angah nulate pawh hruai ve țhîn mah ila, chhungril nun a ruak a, a hlim theih tak tak loh. Hlauh bîk hre si lova, hlauh riau ka neih chang a tam! Eng thilah mah ka hmuingîl ngai meuh lo!

   "Amah in hawisan chuan ani

  pawhin a hawisan ang che u"

 

Tunah erawh chuan A khawngaihna zarah, theih ang tâwk tâwka Lalpa lam hnaih deuh deuh tûrin thuthlûkna ka lo siam ve ta a. Ka kutte hi lehkha den nan te, eirûk nan te, zu no dawmnan te, Lalpa nêna kan tihdun theihloh thil tihnan ka hmang phal tawh lova. Ka nupui leh ka fate chunga kut ngata ka tawngtainate pawh Lalpan chhân tlâkah a pawm ta a. He chhungkaw tereuh tê ka din ve hi Lalpa Kohhran tereuh tê alo ni reng tih ka hrechhuak ta a. Chu Kohhran têtak têah chuan Lalpan Ama aiawhin kei, chhungkaw paber hi Puithiamah min ruat alo ni si a. Ka ka hi zu in nan, thu lawilo leh bawlhhlawh mai mai sawi zuah zuah nan ka hman phal tâk loh chinah chuan, ka thusawite pawh miten thu puitlingah an ngai ve ta a.

 

Ka dîlna te pawh chhânin alo awm tawh țhîn avangin ka fate ka hauhna țawngkam ânchhe rawngkai deuh deuhte pawh ka hmang ngam tawh lo: a thlen dik palh hlauh chuan a pawi dawn êm mai! An chungah Puithiam ka ni si a!

 

Mihring thil tak pawhin, kan chhungkua kan phuisui ve țan tial tial a. Zu case ruak awm rem rum  țhin na ah refrigerator thar tuamna bawm ruak; Bagpiper ho calendar intâr țhinna hmunah Isua thlalâk; tu lei mah ka bat ka hre tawh heklo; changkânna hmuhtûr a tam mai! Kan nupa kan inhau tawh ngai lova, kan fate an hrisêl, an zirlaiah pawh a vantlang chunglam țhah an ni ta;

 

Ama lam kan țan chhung zawng chuan Lalpa hi kan lamah a țang hreh lo tih kan hre tawh si a.